النهاردة هتكلم عن مصر كلام من قلبي

النهاردة هتكلم عن مصر كلام من قلبي

أتمنى إنكم تتحملوني .. وأتمنى تعرفوا وتتاكدوا إني بحب البلد ده برغم كل السلبيات اللي فيها
حب مش عادي .. حب وصل لدرجة العشق وخصوصآ لما بعدت عنها وعاشرت ناس غير أهلها
.. السجن ما اتذكرش في القرآن الكريم إلا في مصر في سورة يوسف
.. في مصر بس الأموات بيصروا على الأحياء (( الفراعنة )) .
.. في مصر بس هتلاقي شخص أقل منك في المستوى العلمي
وحصل على 50 % بس في الثانوية العامة
لكن تلاقيه بيتنطنط عليك لإنه دخل بيهم شرطة .
.. في مصر بس ينمو نبات البردي وورد النيل والجرجير والخبيزة والليف .
.. في مصر بس تسكن السلعوة وهي مسخ ناتج من تزاوج الكلاب الضالة في جو العاصمة الملوث .
.. في مصر بس تاكل الحواوشي والشكشوكة والعجة والكشك الأسيوطي والملوخية بالأرانب
والمسقعة والكشري ومحشي الكرنب وطاجن العكاوي والكبدة الاسكندراني .
.. في مصر تعبر الكلاب الشوارع بالطريقة نفسها اللي بيعبر بيها البني آدمين
تقف الكلاب على جانب الطريق ويبصوا يمين وشمال وتعبر في أمان
وياريت الناس بتعبر بالطريقة نفسها
لكن المواطن المصري بيعشق يعبر الشارع زي طائر البطريق .
.. في مصر بس يمتلك المواطن بالوقت والممارسة مهارات خاصة في ركوب الأتوبيسات السريعة
والتسلل إلى العمق أو الوقوف بأطراف أصابع القدم على آخر درجة في السلم
والغريب رد الناس اللي جوة ومنهم الكمسري والسواق بصوت واحد (( إطلع من على الباب )) .
.. في مصر بس الصداقة بتحصل في أقل من ثواني
سواء في إشارة مرور أو طابور مصلحة حكومية أو في الاسانسير .
.. في مصر تلاقي منطقة سكنية بأكملها سارقة كهربا .
.. في مصر بس ملك فرعوني فنان بنى لنفسه تمثال ضخم لا تشرق الشمس على وجهه إلا مرتين في السنة
مرة يوم تتويجه ملك ومرة يوم عيد ميلاده هو شخصيآ
( صبح .. صبح .. يا عم الحاج ) .
.. في مصر بس وزير يسرطن الشعب وبعد كدة يترشح في أنتخابات مجلس الشعب .
.. في مصر بس بينادي وزراء التعليم بإلغاء مجانية التعليم .
.. في مصر بس يتم إنفاق ملايين الجنيهات علشان الحصول على صفر المونديال
( كانوا خايفين ياخدوا درجة بالسالب )
.. في مصر بس الإختيارات السياسية المتاحة أمام المواطن هي التصويت بعم أو لا .
.. في مصر بس الكشري بيتقدم سخن في أكياس بلاستيكية شفافة .
.. في مصر بس لا يمتلك المواطن زي رسمي موحد
وصعب جدآ تعرف المصري من لبسه
( إلا لو كان لابس تي شيرت مكتوب عليه بالأخضر .. فكر جديد ) .
.. في مصر بس .. ادفع وبعدين اشتكي .
.. في مصر بس تم القضاء نهائيآ على ظاهرة إدمان الهيروين والبانجو
وأصبح الحشيش في متناول يد الجميع .
.. في مصر بس كان رئيس حزب لابس طربوش .
.. في مصر بس ما يتمش وضع الملصقات إلا تحت يافطة مكتوب عليها
(( ممنوع لصق الملصقات )) .
.. في مصر بس بولاقين .. بولاق أبو العلا وبولاق الدكرور .
.. في مصر بس يوجد نوع من المسكنات على هيئة مصطلحات يتم تقديمها للشعب بجرعات مكثفة
زي التمثيل المشرف ، الشفافية ، إشادة البنك الدولي بمصر ، أهمية الدور اللي بيلعبه الشباب .. جيل السمتقبل .
.. في مصر بس حالة من الشعور بالأمان الخفي تشعر بيها وما تشوفهاش
بداية بهجرة أهل بيت النبي بعد حادثة كاربلاء إلى القاهرة حيث وجدوا في رحابها الأمن وكرم الضيافة
نهاية بالزعيم الراحل ياسر عرفات اللي قال في أحد حواراته الصحفية
لا أنام جيدآ إلا في مصر .
.. في مصر كل عقدة وليها حلال .
...
.. تفتكروا في مصر بس إيه تاني

جميل يا رانا
شكرا ليكى

الكلام عن مصر مش بيخلص
شكرا رانا

اتكلمى براحتك رانا كمان وكمان

ما اجمل الكلام عن مصر

جزاكى الله كل خير