يعني خرجت يا أمينة !
الرجالة ماتوا في 73 تفتكر المقولة دي صح ولا غلط ؟ بصراحة كدة ومن غير ما نخبّي على بعضينا الرجالة لم يموتوا وانما اندثروا هذه الأيام وخدوا لهم جنب وأوشكوا على الإنقراض ليفسحوا المجال للجنس الآخر الذي بدأ ضعيفا مكسورا الى أن تمكن وتجبر وتسلم مقاليد الأمور فأنا أشبه الرجل بالديناصور لم يتمكن من العيش في هذا العالم لقوته وصلابته فأفسح المجال لصغار الكائنات أمثال الغزالة والنعامة والطاووس كمان ! فالرجل قديما مش زمان قوي ..لأ ..
من ييجي خمسين سنة كده كان راجل له كلمة وكلمته على رأي عمنا عبد الفتاح القصري لا يمكن تنزل الأرض أبدا ً ! ومن بعد عمنا عبد الفتاح أو من بداية عهده الكلمة بقت تنزل وأصبح نزولها هو العادي بتاعنا ! وخلاص راح زمان سي السيد اللي عاقب أمينة ليه ؟ عشان خرجت وراحت الحسين من ورا ضهره مع إن سيدنا الحسين نادها فلبت على حد قولها !
واللذيذ ان الستات أو الجنس الطيف اذا اعتبرناهم كذلك ! بيطالبوا بالمساواة بالرجل بالرغم من حصولهم على كل شيء بدءاً من الشقة فهي من حق الزوجة الى كوتة في البرلمان وكمان أخذوا العمودية ومش بس كده دخلوا الوزارة وكمان ليهم مجلس قومي يرعى حقوقهم وخلي ...... يتطاول عليهم ولا حتى يدوس لهم على طرف تبقى فضيحته بجلاجل وهذا هو الجزاء المعنوي أما الجزاء المادي فلك أن تتخيله بنفسك !
عايزين ايه أكتر من كده - سيبونا - في حالنا ، إحنا كمان كرجالة أو بقايا رجالة المفترض يكون لنا مجلس محترم يطالب بحقوقنا ويساوينا بالستات يارجال العالم اتحدوا نحط ايدينا في ايدين بعض لكي نقاوم الهجمة الشرسة على جنسنا حتى نحافظ على بقائنا ولا نكون آخر الرجال المحترمين .. ! ونطالب المسئولين بتخصيص عربتين للرجال بمتروا الأنفاق هما الستات أحسن مننا وبعدين هما راكبين معانا في كل العربات وتدخل الفتاة من دول الى المترو ويا سلام لو وقفت وانت جالس ستجد لسان حالها يلعن أبو العيشة واللي عايشينها بعد أن تلعن جدودك طبعا لأنهم فشلوا في تربيتك ولم يزرعوا بداخلك الإحساس وبالتالي خرجت راجل معدوم الإحساس وآسف في اللفظ " ماعندكش دم " لأنها واقفة وانت جالس وآخر انسجام ..!
المهم أنا عارف ان لسان حالك حينها سيرد بكل تبجح في سرك طبعا " اركبي العربية المخصصة ليكم يا شاطرة " لكن أنا عارفك طبعا من أواخر الرجال المحترمين وإذا كانت الواقفة أمامك ست كبيرة وزي والدتك مش مصر ! والدتك انت الطبيعى إنك تقوم وتجلسها مكانك عشان تبقى راجل وتستحق تطالب بحقوقك .
بس أرجع وأقول ان احنا لازم نكون واقعيين ونعي جيدا أن زمن سي السيد ولى وراح وزمن أمينة أتى ولاح في الأفق أو تقدر تقول هذا هو زمان أمينة الله يرحمك يا سي السيد ! بس تفتكروا ورا كل رجل عظيم امرأة فعلا ولا ده كلام في – الأمبلايز- ؟ بصراحة فعلا ورا كل رجل عظيم امرأة والدليل سقراط لم يصل الى ما وصل اليه من الحكمة لو لم تكن له زوجة تضيق به وتسخر منه ومن فلسفته ومن ملابسه الرثة ومنظره البشع ! وكانت تثور عليه وتلقي على رأسه بالماء القذر وكان الفيلسوف يضحك ويقول: إن زوجتي كالسماء تبرق وترعد ثم تمطر!
في الجمهورية بتاعتي الولد مش زي البنت وليس كمالة عدد ورحم الله سعاد حسني التي قالت البنت زي الولد مش كمالة عدد ! لأن الرجال قوامون على النساء ولو مش عاجبِك كلامي ناقشيني واقنعيني وأنا متأكد انك لن تنتصري وستخرجي من المناظرة تجري أذيال الهزيمة ويا أسفاه على البنات والستات !
فالرجالة بالجمهورية بتاعتي لهم حقوق وعليهم واجبات فالعِشرة بالمعروف ولا ضرب ولا قلة أدب معاملة آدمية من الطرفان لا يضرب ولا - ينضرب - أصل عيب قوي لما يبقى راجل وينضرب! وللرجالة عربيتين في المترو زي السيدات بالظبط والمجلس القومي لحقوق الرجالة يدافع عن الرجال بكل ما أوتي من قوة والستات من حقهم يشتغلوا بس لما الرجالة كلها تشتغل بمعنى فيه أولويات نخلص شغل للرجالة وبعدين نشوف الستات !
اهداف المجلس القومي لحقوق الرجالة : حماية حقوق الرجل في المجتمع تحسين صورة الراجل في المجتمع توضيح الهدف من هجوم الستات على الرجالة المطالبة بحقوق الرجالة من الستات
شعار المجلس : احنا رجالة عندنا عزه و كرامة 3. من مبادئ المجلس القومي لحقوق الرجالة - انا مش بدافع عن الراجل البصباص الي مش عارف يتحكم في نفسة و كمان الرجل الخائن انا ضده تماما- انا بدافع عن باقي الرجالة الي راحت في الرجلين و هما ملهمش ذنب
- احنا ضد الرجالة المفتريين وكذلك السيدات - احنا بنهاجم البنات اللي بتتلكك
اعلان هام
يعلن المجلس القومي لحقوق الرجالة تحياته و تضامنه مع نهى رشدي و منه لله الذي تحرش بها ..! وكان يستاهل اعدام لأنه أساء الى سمعة الرجالة وبوظها أكتر ماهي بايظة وياريت البنات ما يخدوش الموضوع حلوانة في سلوانه و يقعدوا يقولو ان الرجالة كلهم كده و هات يهجوم علينا لذلك يعلن المجلس استمرار عمله في المحافظة على صورة الرجل .!
في النهاية لازم نعرف ان الراجل راجل والست ست .. وأعتذر الى السيدات والبنات اذا كنت تحاملت عليهم سامحوني والله أنا بجد مقدر إن إذا كان فيه بنات وستات خلّونا نأخذ انطباع سيء عن الجنس اللطيف فأنا متأكد إن فيه بنات غاية في الأدب والإحترام ونتمنى انتشار هذا النوع في الأسواق قريبا أو توفره لنا الصين اذا كان مكلفا وبرضك لن أتنازل عن المجلس القومي لحقوق الرجالة وبالعند في الستــــــات ...!
الإثنين أغسطس 25, 2014 10:10 pm من طرف أبو أحمد
اليومية
البلد
